Auteur : Mitrophane
Date de création : 05-03-2009
Una ressenya provençal
Prouvènço d'aro, n° 307, febrer del 2015
Peireto Berengier
Matar De Gaulle
Joan Daniel Bezsonoff, es un escrivan catalan de Roussihoun. Vous avèn deja presenta de roman siéu coume Les Amnèsies de Déu, Els taxistes del tsar, Una educació francesa e d'autre encaro coume La Revolta dels Geperuts.
Lou mai souvènt, si rouman retrason l'istori countempourano recènto e nous ramenton de moumen viscu emé si joio, sis interrougacioun, si detai (un disque, un filme, uno marco d'essènci, un moudèle de veituro, uno reclamo que l'avian óublidado).
Éu, se ramento de tout, dóu mendre detai coume di grand fa. Sèmblo que counèis tout e qu'a viscu trento vido. Si souveni soun li nostre multiplica pèr cènt! Soun gust e sa couneissènço de la literaturo, soun gust e sa counèissenço de l'istori (atualita de i'a gaire) an d'equivalènt que soun umour e soun biais de pinta lis ome em'uno umanita di grando. Vai ainsi que cade rouman nous mostro un escrivan coume amarian de n'agué forço, óuriginau, plasènt, saberu e generous. Sa darriero obro es un eisèmple de proumiero de tout ço qu'amo e tout ço qu'es Joan Daniel Bezsonoff. Un rouman singulié, que se i'esperiavan belèu pas. Matar De Gaulle parlo d'Algerìo, de la guerro, di malur e dis ome deçaupu pèr la poulitico dóu generau. Bezsonoff pren lou courounèu Jean-Marie Bastien-Thiry, si coumpan e la famiho catalano Vidal coume de persounage de rouman e nautre seguissen lou retour di rapatria, l'abandoun di harki coume l'ourganisacioun de l'atentat dóu Petit-Clamart, coume s'èro un rouman vertadié. Li souveni de la vido eilà, li souveni di crime, li decepcioun à l'arribado en Franço e l'envejo de tuia De Gaulle lou traite pèr venja li crime dóu FLN proutegi pèr l'armado franceso, soun mescla en tóuti li passioun de l'escrivan: lou mounde de l'armado, lou catalan, lou prouvençau, li lengo minourisado luenchenco (l'afrikaans), etc.
L'estile clar e rapide es agradiéu e se prenèn à legi lou catalan coume nosto lengo. Fau legir Bezsonoff pèr realisa de quant es un escrivan singulié e generous, que nous fai ama de sujet qu'aurian de-segur leissa de caire se fuguèsson esta trata en francés e pèr un autre...